ଭୁବନେଶ୍ୱର : ଓଡ଼ିଆ ସିନେ ଜଗତର ଗୌରବ କଳିଙ୍ଗ ଷ୍ଟୁଡିଓକୁ ନେଇ ଆସିଛି ଏକ ବଡ଼ ଖବର। ଏହି ଐତିହାସିକ ଷ୍ଟୁଡିଓର ପରିଚାଳନା ଓ ରକ୍ଷଣାବେକ୍ଷଣ ଦାୟିତ୍ୱ ଏବେ ଘରୋଇ ସଂସ୍ଥାକୁ ଟେକି ଦେବାକୁ ପ୍ରକ୍ରିୟା ଆରମ୍ଭ ହୋଇଛି। ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ (OFDC) ପକ୍ଷରୁ ଏହି ନିଷ୍ପତ୍ତି ନିଆଯାଇଥିବା ସୂଚନା ମିଳିଛି।ଷ୍ଟୁଡିଓର ରକ୍ଷଣାବେକ୍ଷଣ ପାଇଁ ଓଏଫ୍ଡିସି (OFDC) ପକ୍ଷରୁ ସମ୍ପୃକ୍ତ ଠିକା ସଂସ୍ଥାକୁ ପ୍ରାୟ ୮ କୋଟି ଟଙ୍କା ପ୍ରଦାନ କରାଯିବ। କଳିଙ୍ଗ ଷ୍ଟୁଡିଓର ନବୀକରଣ ପରେ ଏହାର ଚମକ ବୃଦ୍ଧି ପାଇଥିଲେ ମଧ୍ୟ ଏହାର ସଠିକ୍ ପରିଚାଳନା ପାଇଁ ସରକାର ଏବେ ବାହାର ସଂସ୍ଥା ଉପରେ ଭରସା କରୁଛନ୍ତି।ଷ୍ଟୁଡିଓର ଆଧୁନିକ ସରଞ୍ଜାମ, ସେଟ୍ ଏବଂ ପରିବେଶର ଯତ୍ନ ନେବା ପାଇଁ ଏହି ଚୁକ୍ତି କରାଯାଇଛି।ସରକାରୀ ସଂସ୍ଥା ପରିବର୍ତ୍ତେ ଘରୋଇ ସଂସ୍ଥାକୁ ଦାୟିତ୍ୱ ଦେବାକୁ ନେଇ କିଛି ମହଲରେ ପ୍ରଶ୍ନବାଚୀ ସୃଷ୍ଟି ହୋଇଛି।କଳିଙ୍ଗ ଷ୍ଟୁଡିଓକୁ ବ୍ୟବସାୟିକ ଭାବେ ଅଧିକ ସଫଳ କରିବା ଏବଂ ବାହାର ରାଜ୍ୟର ପ୍ରଯୋଜନା ସଂସ୍ଥାକୁ ଆକୃଷ୍ଟ କରିବା ପାଇଁ ଏହି ପଦକ୍ଷେପ ନିଆଯାଇଥିବା କୁହାଯାଉଛି।କଳିଙ୍ଗ ଷ୍ଟୁଡିଓ କେବଳ ଏକ ନିର୍ମାଣ ସ୍ଥଳୀ ନୁହେଁ, ଏହା ଓଡ଼ିଆ ସିନେମାର ଭେଟେରାନ କଳାକାରଙ୍କ ସ୍ମୃତି ସହ ଜଡ଼ିତ। ତେଣୁ ଘରୋଇ ସଂସ୍ଥାକୁ ଟେକି ଦେବା ପରେ ଏହାର ମୂଳ ପରିଚୟ କାଳେ ପ୍ରଭାବିତ ହେବ, ସେ ନେଇ ଚଳଚ୍ଚିତ୍ର ପ୍ରେମୀଙ୍କ ମଧ୍ୟରେ ଆଶଙ୍କା ଦେଖାଦେଇଛି।
